Ambasadaoro Kolejy - Toko faha-14

NY HERIN'NY FANAHY MASINA

            Nanao ity fampanantenana manaraka ity tamin’ireo mpianany i Jesosy: " Fa hahazo hery ianareo amin'ny hilatsahan'ny Fanahy Masina aminareo…" (Asan’ny Apostoly 1:8).

            Inona no tiany holazaina tamin'ity fanambarana ity? Io hery io ihany ve, ilay Fanahy izay nitoetra tao Aminy ary nahavitany nanaiky nankatoa tanteraka an'Andriamanitra Ray? Ahoana no azo hampiharana io fampanantenana io amintsika ankehitriny?

               Vitsy kely ny olona mahazo ny tena atao hoe Fanahy Masina, ny fahefany na ny heriny. Tsy nateraka nanana Fanahy Masina isika. Mila mandray izany isika (Asa.2:38).
               Ny Fanahy Masina dia loharanom-pahefana tena mahagaga, mahery vaika sy mavitrika, izay mety hikambana amin'ny fanahintsika. Io no maha-Izy an'Andriamanitra, ny ainy, heriny, fanahiny ary fombany. Io no fahefana afaka manao fahagagana, ary tsy maintsy ho ao anatintsika mba hahafahantsika hiova.
               Jesosy Kristy dia feno izany fahefana avy amin’Andriamanitra izany. Noho izany no nahafahany nanao fahagagana maro (Asa 2:22). Nanasitrana ny marary izy, nandroaka demonia, nandidy ny tafio-drivotra ho tonga tony, nanova ny rano ho divay. Tamin'ny herin'ny Fanahy Masina, dia nitandrina tamin’ny fomba lavorary ny lalàn'Andriamanitra Izy, dia ny Didy Folo (1Pet.2:21-22).

            Jesosy dia nanana izany fahefana ngezabe izany; na izany aza, dia nanambara Izy hoe: "« Raha Izaho ihany, dia tsy mahay manao na inona na inona…" (Jaona 5:30). Niasa Izy noho ny herin’Andriamanitra. Hoy Izy :«  ny Ray mitoetra ato amiko no manao ny asa. » (Jaona 14:10)

            Ny Ray dia nitoetra tao amin'i Jesosy tamin'ny alàlan’ny Fanahy Masina.

Ny hery hankatoavana ny lalàn'Andriamanitra

               Jesosy dia tsy manafoana ny Lalàna. Izy no nampahery sy nanome azy fahalebeazana ambony kokoa, ka nanantitrantitra ny dikany ara-panahy (Isaia 42:21). Nampianatra Izy fa na dia mankahala rahalahy iray ao an-tsaina aza dia efa fahotana (Mat.5:21-22 ; 1Jaona 3:15).
               Eny tokoa, nohamafisiny ny Lalàna ka nomeny haavo ara-panahy lehibe indrindra; Nasehony antsika - tamin'ny fiainany teto an-tany - ny fombahampiharana ny lalàna ho tonga amin'ireo tanjona fahalavorariana ara-panahy ireo. Ny fifehezana fotsiny ny ataontsika dia tsy ampy intsony: sahala amin’i Jesosy, dia tsy maintsy manana fo sy saina madio isika, tsy misy fahotana.
               Na izany aza, ireo izay mieritreritra fa efa nofoanana ny Lalàna dia hiteny hoe: "Tsy misy olona afaka mitandrina ny didy amin'ny halebeazany ara-panahy. Raha amin’ny maha-olombelona, dia tsy ho vita izany!"
               Marina izany. Ny Isiraely fahiny, izay tao ambanin'ny Fanekena Taloha, dia nanaporofo izany tamintsika. Tsy misy olona afaka mitandrina  tanteraka ny Lalàna. Tsy nieritreritra ny hitandrina ara-panahy ny Lalàn'ny Fitiavana ny Isiraelita. Isika koa, amin'ny ezaka ataontsika, dia tsy hahavita na oviana na oviana hanao izany. Mila ny herin'ny Fanahy Masina isika.
               Noho izany fanampiana izany, dia hahazo ny valisoa lehibe sady mahasambatra isika, izay vokatry ny fitandremana ny Lalàna. Ary koa, afaka mifampizara amin'i Abrahama ny fampanantenana ny lova mandrakizay izay natao taminy isika.

Io fahefana io dia afaka mitoetra ao aminao

               Manohy ny asany Andriamanitra ho amin'ny tanjona lehibe izay ananany ho an'ny olona. Namorona ny olombelona Izy - izay sangan'asan'ny zavaboariny rehetra - avy amin'ny vovoky ny tany, araky ny endriny, fa avy amin'ny tanimanga (Gen. 1:26, 2: 7).
               Tamin’ny namoronany ny olombelona, dia tsy napetrany tao aminy ny Fanahiny Masina. Kanefa, amin'ny alalan'io hery io ihany no hahafahan'ny olombelona hitandrina ny lalàna ara-panahy, ny Lalàn'ny fitiavana, izany hoe ny Didy Folo.
            Tahaka ny olona izay noforonina avy amin'ny zavatra fizika sy mety maty (tsy manana afa-tsy fiainana ara-nofo, tsy maharitra - tohanan'ny sakafo, ny rano, ny fifohana rivotra ary ny fielezan’ny rà), dia toy izany koa, ny Fanahy Masina ihany no afaka mamindra ny fiainana mandrakizay amin'ny olombelona.

            Jesosy Kristy dia tonga nanambara ny fahatongavana be voninahitry ny Fanahy Masina: "Izay mino Ahy, dia hisy onin'ny rano velona miboiboika avy ao an-kibony, araka ny voalazan'ny Soratra Masina. Ary ny Fanahy, Izay efa horaisin'ny mino Azy, no nolazainy tamin'izany"(Jaona 7:38-39).

            Ny Apostoly Peteraa ihany koa, noho ny tsindrimandrin’Andriamanitra, dia nanondro ny fomba handraisana ity hery ity: "Mibebaha, ary aoka samy hatao batisa amin'ny anaran'i Jesosy Kristy ianareo rehetra… ary ianareo handray ny fanomezana, dia ny Fanahy Masina”(Asan’ny Apostoly 2:38).

            Afaka mitoetra ao anatintsika amin’izay ny Fanahy Masina. Izy io dia maneho ny hany hery ahafahantsika - isika izay malemy sy mety maty - hitandrina tanteraka ny didin'Andriamanitra, mba hahazoana ny fitahiana ary hahafahana mandova ny fiainana mandrakizay.

            Isika rehetra dia mila manana ny Fanahy Masina. Ny toetrantsika olombelona dia tsy maintsy miova mba ho lasa mihalehibe amin'ny toetran'Andriamanitra. Ny fitiavan-tena, ny zava-poana, ny fitiavan-tena, ny filàna, ny lolom-po, ny fankahalana ary ny fisalasalana dia tsy maintsy esorina ao anatintsika amin'ny alàlan'ny hery masina izay hiditra ao an-tsaintsika. Ny olombelona dia manohy amin'ny finoana, tsy misy fangarony fa hahazo izany, amin'ny fiezahany manokana, ireo fitahiana tadiaviny.

Porofoina ny Herin'ny Fanahy Masina

1. Aiza no mitoetra ny fahefana? Iza no tompon'ny hery? Sal.62:11. Hain'Andriamanitra hatao ve ny zava-drehetra? Mat.19:26. Tsy manaporofo ve izany fa mahery indrindra Izy? Andininy mitovy.
 
2. Iza no namorona ny lanitra sy ny tany? Gen.1:1. Moa ve Andriamanitra nanao izany rehetra izany tamin'ny heriny? Jer.32:17.
FANAMARIHANA: Izy no Mpamorona. Ho hitanao, amin'ireto andalana ireto, ny hery mpamoron’ny Fanahy Masina izay miasa. Andriamanitra Ray sy ny Zanaka dia Fanahy. Mitovy ny fihetseham-pon’izy roa ireo. Masina Andriamanitra (1Sam.2:2). Ny Fanahiny - ny Fanahy Masina – dia afaka manao zavatra mahatalanjona.
 
3. Afaka manova ny fahefana mpamorona tsy hita maso ho zavaboary fizika sy hita maso ve Izy? Heb.ll:3.
 
4. Ahoana no ampiasan'Andriamanitra io hery io amin'ny asa famoronany? Sal.148:1-5, ary 33:9. Jereo koa Gen. 1: 2-3.
5. Vakio ny Joba 26 mba hananao hevitra misimisy kokoa momba ny herin'Andriamanitra tsy manam-petra.
7. Moa ve miharihary eo amin'ny famoronana fizika io hery mandrakizay io? Rom.1:19-20. Vakio koa ny toko 37 sy 40 ao amin'ny bokin'i Joba.
FANAMARIHANA: Afaka manao ny zava-drehetra Andriamanitra (Lioka 1:37). Tsapanao ve fa ny ampahany amin'ny hery izay nahariany an'izao rehetra izao, sy ireo kintana tsy tambo isaina, dia mety ho ao anatinao koa?
 
8. Moa ve mahalala ny zava-drehetra sy ny manerana ny Onivera ve ny Fanahy Masina? Sal.139:7-8.
 
9. Moa ve manohana ny zava-drehetra amin'ny Fanahiny Masina Andriamanitra? Neh.9:6, Heb.1:3. Manjaka noho ny heriny ve Izy? Sal.66:7.
FANAMARIHANA: Eto indray dia ahitana fampisehoana vaovao ny herin'ny Fanahy Masina izay tsy maintsy mitoetra sy miasa ato anatintsika. Manohana ny zavatra rehetra Andriamanitra amin'ny herin'ny Fanahy Masina.

FANAMARIHANA: Nandidy Andriamanitra hoe: "Misia mazava," "Ary ny fanahin'Andriamanitra nanomba tambonin'ny rano" (Genesisy 1:2) no nanatanteraka ny baiko,"dia nisy mazava" (Genesisy 1:3). Ny Fanahy Masina dia hery manatanteraka fahagagana ary mandresy ny sakana rehetra. Izany Fanahy manan-kery izany no tokony hananantsika ao amintsika.

 

6. Moa Andriamanitra ve namorona ny olona noho io Fanahy manan-kery io? Gen.2:7; Jaona 1: 1-2.

Ny hery ara-panahy izay nampanantenaina tamin'ny olona

1. Mahavita mankatoa ny lalàna ara-panahy ve ny saina ara-nofo? Rom.8:7-8. Inona no vokatr'izany? Inona no vokatry ny fihevitry ny fanahy? Andininy 6.
 
2. Moa ve ny Fanahin'Andriamanitra dia Fanahy mahery sy fitiavana ary fahononan-tena? 2Tim.1:7.
FANAMARIHANA: Ny fanahin'olombelona, raha miray amin'ny Fanahy Masina, dia mitarika amin'ny fiadanana syny fiainana mandrakizay. Nefa raha tsy misy ny fanampian'ny Fanahy masina, ny fanahin’olombelona ara-nofo dia fandrafiana an’Andriamanitra; tsy mahay mieritreritra am-pahendrena izy. Raha lazaina amin'ny teny hafa, mandra-pahazoantsika ny Fanahy Masina, dia tsy afaka manana toe-tsaina salama isika. Ny olona manana izany dia lasa mahay mandanjalanja.
 
3. Moa ve ny Fanahy Masina dia mety ho takatr'i Adama sy Eva tao amin'ny Saha Edena? Gen.2:9. Kanefa, tamin’ny hazo inona no nihinanan'izy ireo ny voankazo? Gen.2:17, 3:3, 6-7.
FANAMARIHANA: Raha nihinana avy tamin’ny hazo maneho ny Fanahy Masina i Adama sy i Eva, tao amin'ny saha Edena - avy amin'ny "hazon'aina" (fiainana mandrakizay) dia ho afaka niaina mandrakizay izy ireo. Na izany aza, mba hahafahan'izy ireo hanana io Fanahin’ny fiainana mandrakizay io, dia tokony ho naniry mafy izany izy ireo, ary hanaraka tsy misy fepetra ny sitrapon'Andriamanitra. Dia toy izany koa ny amintsika rehetra ankehitriny, raha te handray ny Fanahy Masina isika. Tsy misy fomba hafa hahazoana famonjena. Adama sy Eva dia nanaraka ny fomba izay nankasitrahan’ny toetrany manokana, ny lalana mitondra any amin'ny fahafatesana (Gen.2:17). Te hahay hanavaka ny tsara amin'ny ratsy izy ireo. Noho izany antony izany, Andriamanitra dia nanakana azy ireo tsy handray ny Fanahy Masina fitiavana sy fiainana mandrakizay (Gen.3:24).
               Adama sy Eva dia tsy hoe tsy mety maty; noforonina ho mety maty izy ireo, toa antsika ankehitriny. Nilazan’Andriamanitra izy ireo fa amin’ny andro hihinanany avy amin'ilay hazo voarara, dia ho faty izy ireo. Efa nanota daholo ny olona rehetra - ary samy maty avokoa ireo. Ny olombelona dia efa nahalala ny lalàn'Andriamanitra hatramin'ny voalohany; na izany aza, hatrany am-piandohana, dia noheveriny fa azony atao ny mitandrina izany tsy misy ny herin'ny Fanahy Masina.
               Rehefa tsy mankatoa an’Andriamanitra ny olombelona mety maty, dia lasa misaraka Aminy izy. Tsy afaka mahazo ny Fanahy Masina izy, na ny fanomezana ny fiainana mandrakizay. Nandritry ny enina arivo taona mahery izay, dia navelan'Andriamanitra hanaraka ny lalany manokana ny olombelona, ary amin’ny ankapobeny, ny olombelona rehetra dia tsy nitsahatra nifidy ny lalan'ny tsy fankatoavana (Romana 3:23). Raha tsy misy ny Fanahy Masina, dia misarika loza foana isika. Tonga Kristy nanambara ny fahatongavan'ny Fanahy Masina amintsika, sady nanavao koa ny tolotra ho an'izay rehetra te-hanaiky izany. Ny tsirairay dia tsy maintsy mahatsapa ny tsy fahaizany manokana sy ny filany lehibe, ho azy, ny fahazoana ny Fanahy Masina.

4. Inona no sazy azon'izy mivady noho ny tsy nankatoavany an'Andriamanitra? Gen.3:17, 22-24.
 
5. Nahoana ny Isiraely fahiny no tsy afaka nitandrina ny lalàn'Andriamanitra, izay nodidiana tao amin'ny Fanekena Taloha? Deo.5:29.
FANAMARIHANA: Ny Isiraely dia ahitana fiangonana ara-batana sy ara-nofo (Asa.7:38). Satria tsy nanana ny Fanahy Masina izy ireo, dia tsy nanana herin-toetra ny olona - ny "fo" hanajàna marina ny fanekem-pihavanana nataony. Tsy mbola nomena azy ireo ny Fanahy Masina, satria tsy tokony mbola hidina Izany raha tsy aorian'ny fahafatesana sy ny fitsanganan'i Jesosy Kristy amin’ny maty (Jaona 7:39). Hatramin'ny andron'i Adama, dia navelan'Andriamanitra ny olombelona hahatsapa avy amin’ny tenany ihany ny vokatra mahonenan’ny fiainana iray tsy misy Fanahy Masina.
 
Ny rariny, teo ambanin'ny Fanekena Voalohany, dia tsy notanterahina raha tsy tamin’ny ezaky ny olona fotsiny ihany. Ny tsy fankatoavan'ny olombelona dia manaporofo fa tsy mahavita noho ny fiezahany manokana izy, hanaraka ny lalàn'Andriamanitra.
 
6. Amin'ny fomba ahoana no hanovan'Andriamanitra azy mba hankatò izany? Ezek.36:26-27.
 
7. Moa ve, raha izany, mety ho azo alain’izay rehetra te handray azy ny Fanahy Masina? Joela 3:1-2.
 
8. Tsarovy fa ny Fanahy Masina dia ampitahaina amin'ny "rano velona" (Jaona 7:38-39). Iza no loharanon'aina sy herin'ny Fanahy Masina? Jer.17:13, Jaona 4:10, 14.
FANAMARIHANA: Jesosy Kristy no Mpanalalana ny "fanekena tsara lavitra"," natao tamin’ny teny fikasana tsara lavitra" (Heb. 8: 6). Isan'ireo fampanantenana sarobidy ny fanomezana ny Fanahy Masina, izay ampitahaina amin'ny "rano velona".
 
9. Moa ve mampanantena Andriamanitra fa hanome ny Fanahiny feno hery amin'izay rehetra maniry azy marina ary “mangetaheta” izany? Isaia 44:3; Jaona 7:37-39.
 
10. Rahoviana ny Fanahy Masina no ho afaka indray ho azon’ny olona? Jaona 7:39, 16:7. Tsy manaporofo ve izany fa, amin'ny ankapobeny, dia tsy nomena ny olona talohan'ny nahafatesana sy niakaran'i Kristy izany? Ny Mpananatra dia ny Fanahy Masina.
 
11. Nampanantena ve i Jesosy fa hitoetra ao amin'ny mpianany ny Fanahy Masina, izany hoe amin'izay rehetra manaraka Azy ? Jaona 14:17.
FANAMARIHANA: Rehefa natolotr’Andriamanitra an'i Adama ny fahafahana handray ny Fanahy Masina ho fanomezana, ny toetran'ny olona, eo ambany fitarihan'i Satana, dia nivadika tamin’ny Mpamorona azy ary nifidy ny lalan'ny fijaliana sy ny fahafatesana. Na izany aza, Andriamanitra, noho ny famindram-pony lehibe, dia nampanantena fa ho avy ny andro izay hananan'ny olona fahafahana indray handray ny Fanahy Masina; ho afaka hankatoa ny Lalàna ara-panahy izy amin’izay, ary hahazo ny fitahiana ara-batana sy ara-panahy. Ny Fanekena Vaovao dia mampanantena izany.

 

Nanana io hery io i Kristy

1. Moa ve Kristy, ilay Teny, dia tonga nofo sy rà, izany hoe olombelona iray manana toetra mitovy amin’ny antsika? Heb.2:9, 14; Jaona 1:14 sy Heb.4:14.15. Notorontoronin’ny Fanahy Masina tamin'ny fomba mahagaga ve Izy? Mat.1:18-20.

FANAMARIHANA: Tonga olombelona Izy. Tsy ho nanana hery ara-panahy izy raha tsy notorontoronina, ara-batana sy ara-panahy, tamin'ny herin'ny Fanahy Masina. Noho izany faha-torontoronana izany no nahazoany ny hery ara-panahy izay nahatonga fahagagana.
               Na dia, amin’ny maha-olombelona antsika, isika dia tsy notorontoronina tamin'izany fomba izany, ny faha-torontoronan'i Jesosy dia modely amin'ny faha-torontoronantsika ara-panahy. Io hery io dia hanova sy hampahery antsika tahaky ny fomba izay nanampiany an'i Jesosy.
 
2. Moa nameno Fanahy Masina an’i Jesosy ve Andriamanitra Ray? Jaona 3:34. Inona no nataon'i Jesosy noho ity hery miavaka ity? Asan’ny Apostoly 10:38.
 
3. Inona ireo fahagagana sasany nataony noho ny herin'ny Fanahy Masina Izay mitoetra ao Aminy?
               Novainy ho inona ny rano? Jaona 2:1-11. Ahoana ny fomba nataony tamin’ilay lehilahy nitoeran'ny demonia? Marka 1:22-28. Mahavita nanadio ny boka ve Izy? Marka 1:40-42.
 
4. Inona no nataony rehefa nanonja mafy ny ranomasina? Mat.8:23-27. Ahoana no nanehoany ny famindram-pony tamin'ireo jamba? Mat.9:27-31. Inona no fahagagana nataony tamin'ilay lehilahy maty tanana? Mat. 12: 8-13.
 
5. Ahoana no nanomezany hanina ireo olona nisy dimy arivo lahy ireo? Mat.14:15-21. Moa ve ny herin’Andriamanitra, mitoetra ao Aminy, dia lehibe loatra ka na dia ny fikasihana ny somotraviavin-dambany aza dia nanasitrana ny marary? Mat.14:34-36. Nanangana tamin'ny maty an’i Lazarosy ve izy, noho ny herin’Andriamanitra? Jaona 11:39-45.
FANAMARIHANA: Ireo dia sasantsasany fotsiny tamin’ireo fahagagana voarakitra ao amin'ny Filazantsara efatra. Ny herin'Andriamanitra, izay nasehon'i Jesosy elabe, dia afaka manova ny toetrantsika ara-nofo ho toetra ara-panahy, izay eken'Andriamanitra.
6. Niaiky ve i Jesosy fa raha Izy irery, dia tsy afaka manao na inona na inona? Jaona 5:30. Koa iza izany no nahavita ireny asa mahatalanjona ireny? Jaona 14:10.
 
7. Nampianatra ny fitandremana ny lalàna ve i Jesosy? Isaia 42:21, Mat.5:27-28, 43-44.
FANAMARIHANA: Nambarany fa lalàna ara-panahy ny Lalàn'Andriamanitra. Ohatra, anio, dia misy olona iray izay meloka amin'ny fandikana ny lalàna noho ny fanitsakitsaham-bady, tsy hoe amin’ny fanaovana ny fihetsika ara-batana fotsiny ihany, fa koa raha vao mijery olona manana fitaovam-pananahana tsy mitovy amin’ny azy ka mitsiriritra hila azy. Ny fihetsika ara-tsaina misy tsy fankatoavana dia mandika ny tanjona ara-panahy tafiditra ao amin'ny Lalàna. Ny Testamenta Vaovao iray manontolo dia manamafy ny fanahin'ny Lalàna.

8. Na dia olombelona aza i Jesosy, moa ve nasehony fa afaka nitandrina ny soratra sy ny fanahin'ny Lalàna koa Izy? Heb.4:14-15, 1Pet.2:22.

9. Namela ohatra tonga lafatra ve Izy mba hanarahantsika ny diany amin'ny zavatra rehetra? Tokony hanahaka Azy ve isika? 1Pet.2:21.
 
10. Ahoana no nametrahany ohatra ho antsika? Jaona 15:10 sy Mat.19:17.
FANAMARIHANA: Namitaka ny olona i Satana ka nampino azy fa tsy mila mitandrina ny Lalàna izy (2Kor.11:13-15). Rentsika indraindrayny olona milaza fa Jesosy, amin’ny maha-Mpamonjy Azy, dia tonga nitandrina ny lalàna hisolo antsika. Diso izany fampianarana izany. Raha afaka nitandrina ny Lalàna i Kristy, dia ho azontsika atao koa ny mitandrina izany, amin'ny fanampian'ny Fanahy Masina. Nosedrain'ny filan'ny toetran’olombelona Izy, kanefa tsy nanota akory. Nanohitra ny fahotana Izy, satria feno ny herin'ny Fanahy Masina.

Mitsangana amin'ny maty ho amin’ny tsy fahafatesana

1. Moa ve i Kristy no Andriana - Lohan'ny famonjena antsika? Heb.2:10. Izy ihany ve no mpanao izany? Heb.5:9.
FANAMARIHANA: Izy no Andrian'ny famonjena antsika, satria Izy no manorina ny lalana tokony harahintsika, mba ho tafatsangana amin'ny maty ho amin’ny tsy fahafatesana isika. Raha tsy misy Azy, dia tsy manana fanantenana isika.
 
2. Lasa lahimatoa amin'ny maty ve Izy? Heb.1:6, Kol.1:18.
 
3. Nahoana Andriamanitra no nanangana azy ho amin'ny tsy fahafatesana? Rom.8:10.
4. Moa ve i Kristy niaina ny fiainany tao amin'ny Apostoly Paoly, izay olombelona? Gal.2:20. Azo antoka ve ny fanantenan'i Paoly ny tsy fahafatesana? Andian-tsoratra mitovy.
FANAMARIHANA: I Jesosy Kristy koa dia afaka miaina ny fiainany ao anatintsika noho ny herin'ny Fanahy Masina. Noho io Fanahy io izay mitoetra ao anatintsika, dia ao amin'i Kristy isika ary Kristy ho ao amintsika. Hatsangana amin'ny maty ho amin’ny tsy fahafatesana isika amin'ny fiavian'i Kristy fanindroany.

FANAMARIHANA: Amin'io andininy io, dia vakiana fa " fiainana kosa ny fanahy noho ny fanamarinana", izany hoe ny Fanahy Masina dia fiainana mandrakizay noho ny fahamarinana ara-panahy. Jesosy, araka ny efa hitantsika, dia notorontoronin’ny Fanahy Masin'ny Ray, izay mitoetra ao Aminy ny heriny, ary mitazona azy ho madio ara-panahy mandra-pahafatiny. Izany no antony nananganan'ny Ray Azy ho amin'ny fiainana mandrakizay.

Ny Fidinan'ny Fanahy Masina

1. Moa ve Jesosy nampanantena ny mpianany, izay olombelona daholo, fa hahazo ny herin'ny Fanahy Masina izy ireo aorian'ny fitsanganany amin’ny maty? Lioka 24:49. Tokony hijanona ao Jerosalema hiandry io fampanantenana io ve izy ireo? Andiany mitovy. Jereo ihany koa ny Asa 1:4. Moa ve izy ireo hatao batisa amin’ny Fanahy Masina? Asan’ny Apostoly 1:5-8.

2. Inona no seho fambara mahery vaika nasehon'ny Fanahy Masina tamin'ny fidinany, rehefa tafangona tamin'ny toerana iray ny mpianatra? Asan’ny Apostoly 2:2-4, 8,11.
FANAMARIHANA: Nidina toy ny rivotra mahery mifofofofo ny Fanahin Andriamanitra. Tonga toy ny fisehon'ny lela afo Izy ary nameno ny mpianatra izay nanomboka niteny tamin'ny fiteny vahiny. Ny fahagagana dia teo am-pitenenana sy am-pandrenesana. Izany no fanambaràna am-pahibemaso ny fidinan'ny Fanahy Masina.
 
3. Inona no anaran'ilay andro nisian’io fihetsiketsehana io? Asan’ny Apostoly 2:1,4.
 
4. Inona no tokony hataon'ny mpianatra aorian'ny nahazoany ny herin'ny Fanahy Masina? Asan’ny Apostoly 1:8. Efa nilazan'i Kristy mialoha ny momba izany ve izy ireo? Marka 16:15, 17. Mariho indrindra ny andininy faha-17.
FANAMARIHANA: Tamin'io andro Pentekosta io no nahatanterahan'ny ampahan’ny faminanian'i Joela (Joela 3:1-2). Tonga ny Mpananatra, dia ny Fanahy Masina, nidina avy any an-danitra.

FANAMARIHANA: Ny fisehoana tampoka an'ity herin’Andriamanitra ity dia manamarika ny fiandohan'ny vanim-potoana vaovao, satria ny Fanahy Masina, nanomboka tamin'izay fotoana izay, dia natao ho an'ny olombelona rehetra. Io no fiandohan'ilay fotoana nambaran'Andriamanitra mialoha, taonjato maro lasa taloha, fony izy nanambara tamin'ny olony sy tamin'ny firenena rehetra hoe: " « Indro, avy ny andro…izay hanaovako fanekena vaovao amin'ny taranak'Isiraely sy ny taranak'i Joda... Hataoko ao an-tsainy ny lalàko sady hosoratako ao am-pony » (Jer.31:31, 33; Heb.8:8-10).

            Ny andron'ny Pentekosta dia manamarika ny fahatongavan'ny hery izay ampiasain'Andriamanitra mba        hanoratany ny lalàny ao am-pon'izay rehetra manaiky azy. Izany no antony nanaovany an'ity fotoana ity ho fisehoan-javatra mampitolagaga. Izy dia manamafy amin'ny alàlan'ny Fanahiny Masina ireo rehetra handray azy, ka i Kristy, amin'ny fiaviany fanindroany, dia afaka hametraka ny fanekem-pihavanana vaovao miaraka aminy.

Ny Fiavian'i Kristy Fanindroany

Malakia.3:1-2 "« Indro, haniraka ny irako Aho, ary izy hanamboatra lalana eo alohako; ary ny Tompo Izay tadiavinareo dia ho avy tampoka ho eo an-tempoliny; ary ny Anjelin'ny fanekena Izay irinareo, dia, indro, tamy Izy, hoy Jehovah, Tompon'ny maro. Nefa iza no mahatanty ny andro hihaviany? Ary iza no mahajanona, raha miseho Izy? Fa Izy dia tahaka ny afon'ny mpandrendrika sy ny savonin'ny mpanasa lamba"

Jer.23:5 " « Indro, avy ny andro, hoy Jehovah, izay hananganako Rantsana marina ho an'i Davida, ka hanjaka Izy sady ho hendry ary hanao fitsarana sy fahamarinana amin'ny tany"

Dan.7:13-14 " Ary mbola nahita tamin'ny fahitana tamin'ny alina ihany aho, ary, indro, nisy toy ny zanak'olona avy tamin'ny rahon'ny lanitra, ary nankeo amin'ny Fahagola Izy, dia nampanakekeny teo anatrehany. Ary nomena fanapahana sy voninahitra ary fanjakana Izy, mba hanompoan'ny fokom-pirenena sy ny firenena ary ny samy hafa fiteny rehetra Azy; ny fanapahany dia fanapahana mandrakizay ka tsy ho tapaka, ary ny fanjakany tsy ho rava."

Sal.96:13 "Eo anatrehan'i Jehovah, fa avy Izy, Eny, avy hitsara ny tany Izy; Hitsara izao tontolo izao araka ny rariny Izy Ary ny firenena amin'ny fahamarinany."

Isaia 40:10 " « Indro, Jehovah Tompo ho avy amin'ny heriny, ka ny sandriny ihany no hanapaka; indro, ny valim-pitia hatolony dia eny aminy, ary ny valin'asa homeny dia eo anoloany"

Mika 1:3 " « Fa, indro, Jehovah mivoaka avy ao amin'ny fitoerany Ary midina ka mandia ny havoana amin'ny tany"

Isaia 26:21 " « Fa, indro, Jehovah mivoaka avy amin'ny fitoerany hamaly ny mponina amin'ny tany noho ny helony; Ary ny tany hampiseho ny rà izay nofohiny ka tsy hanafina intsony izay novonoina teo aminy."

Zak.14:3-4 " « Dia hivoaka Jehovah ka hiady amin'ireny jentilisa ireny, tahaka ny fameliny amin'ny andro fiadiana. Ary amin'izany andro izany ny tongony hijoro eo an-Tendrombohitra Oliva. izay eo atsinanana tandrifin'i Jerosalema, ary ny Tendrombohitra Oliva hitresaka eo afovoany hiatsinanana sy hiankandrefana, ka hisy lohasaha lehibe; ary ny antsasaky ny tendrombohitra hifindra hianavaratra, fa ny an-tsasany kosa hianatsimo."

Joba 19:25 "Kanefa raha izaho, dia fantatro fa velona ny Mpanavotra ahy, ka hitsangana any am-parany eo ambonin'ny vovoka Izy."

Dan. 2: 34-35 " « Nijery ianao ambara-pahanisy vato voaendaka, nefa tsy nendahan-tanana, ary namely ilay sary teo amin'ny tongony vy sy tanimanga iny ka nahatorotoro azy...Ary ilay vato namely ny sary dia tonga tendrombohitra lehibe nahafeno ny tany rehetra."

Asa 1:9-11 "Ary rehefa nilaza izany Jesosy, dia nakarina Izy, raha mbola nijery izy ireo; ary nisy rahona nitondra Azy, ka tsy hitan'ny masony intsony Izy…Iny Jesosy Izay nampiakarina niala taminareo ho any an-danitra iny dia mbola ho avy tahaka ny nahitanareo Azy niakatra ho any an-danitra."

Heb.9:28 "... Kristy, rehefa natolotra indray mandeha hitondra ny otan'ny maro, dia hiseho fanindroany, tsy amin'ota, amin'izay miandry Azy, ho famonjena."

1 Kor.11:26 "Fa na oviana na oviana ianareo no mihinana itony mofo itony sy misotro amin'ny kapoaka, dia manambara ny fahafatesan'ny Tompo ianareo mandra-pihaviny."

1Pet.5:4 " « Ary rehefa miseho ny Lohan'ny mpiandry, dia hahazo ny satro-boninahitra tsy mety simba ianareo"

Lioka 12:37-40 " « Sambatra ny mpanompo izay ho hitan'ny tompony miambina, raha avy izy…Dia miomàna koa ianareo; fa ho avy ny Zanak'olona amin'izay ora tsy ampoizinareo."

1Kor.4:5 " « Koa amin'izany aza mitsara na inona na inona alohan'ny fotoana, dia ny fihavian'ny Tompo, Izay hampiharihary ny zavatra takona ao amin'ny maizina …"

Mat.26:64 "…Hatramin'izao dia ho hitanareo ny Zanak'olona mipetraka eo amin'ny tanana ankavanan'ny Hery sy avy eo amin'ny rahon'ny lanitra."

Mat.24:27 " « Fa tahaka ny helatra avy any atsinanana ka hita hatrany andrefana, dia ho tahaka izany ny fihavian'ny Zanak'olona."

Mat. 16:27 " « Fa ho avy ny Zanak'olona amin'ny voninahitry ny Rainy, mbamin'ny anjeliny, dia hamaly ny olona rehetra araka ny nataony.

Mat.24:30 " « Ary amin'izany andro izany dia hiseho eo amin'ny lanitra ny famantarana ny Zanak'olona, ka dia hitomany ny firenena rehetra ambonin'ny tany, ary hahita ny Zanak'olona avy amin-kery sy voninahitra lehibe eo amin'ny rahon'ny lanitra izy."

Lioka 9:26 "Fa na iza na iza no ho menatra Ahy sy ny teniko, dia ho menatra azy kosa ny Zanak'olona, raha avy amin'ny voninahiny sy ny an'ny Rainy ary ny an'ny anjely masina."

1 Tes. 4: 16-17 " « Fa ny tenan'ny Tompo no hidina avy any an-danitra amin'ny fiantsoana sy ny feon'ny arikanjely ary ny trompetran'Andriamanitra, ka izay maty ao amin i Kristy no hitsangana aloha; ary rehefa afaka izany, dia isika izay velona ka mbola mitoetra no hakarina hiaraka aminy ho eny amin'ny rahona hitsena ny Tompo any amin'ny habakabaka; dia ho any amin'ny Tompo mandrakariva isika."

Ny asa nataon'ny Apostoly

               Nahazo ny heriny ny Apostoly rehefa niditra tao amin'izy ireo ny Fanahy Masina. Niova ve ny fiainany nanomboka teo?
 
1. Talohan'ny nandraisany Azy, moa ve malemy ara-panahy  izy ireo? Moa ve natory izy ireo tamin'ny alina talohan'ny nanomboana an'i Kristy? Mat.26:40-45.
 
2. Nanda an'i Kristy ve i Peteraa, izay fantany tsara ! Mat.26:69-70, 75. Moa tena niova fo ve izy tamin'izany? Lioka 22:32.
               Moa ve toy izany koa ny mpianatra hafa? Izy ireo koa dia tsy manana toetra misy hery ara-panahy mba tsy tokony hatoriany rehefa nivavaka tao amin'ny sahan'i Getsemane i Jesosy. Rehefa nosamborin'ny miaramila romana i Jesosy, dia nandao Azy ny mpianatra rehetra. Tratran’ny tampoka tsy maha-lehilahy izy ireo, dia nandositra (Mat.26:56)
 
3. Inona no fiovana tamin’ny toetran'i Peteraa taorian'ny nidiran'ny Fanahy Masina taminy - izany hoe rehefa niova fo marina izy? Asan’ny Apostoly 2:14.
FANAMARIHANA: Nisy fiovana mahagaga niseho taminy. Niteny mafy sy tamim-pahasahiana tamin'ny vahoaka tafangona tany Jerosalema izy. Izy sy ny mpianatra sisa, feno ny herin’ny Fanahy Masina, dia nitory tamin-kery lehibe sy faharesen-dahatra, hany ka olona telo arivo no nibebaka tamin'ny fahotany ary natao batisa tamin'iny andro Pentekosta tsy hay hadinoina ity (Asa 2:41).
               Moa ve ny herin'ny Apostoly Peteraa, tamin'ny Fanahy Masina, dia tonga lehibe ka rehefa nandalo izy, ireo izay azon’ny tandindony dia sitrana tamin’ny aretiny? (Asan’ny Apostoly 5:15-16).
 
4. Inona no fahagagana voalohany nataon'i Peteraa? Asa.3:2, 4-8. Moa ve izy sy Jaona nirehareha tamin’izany? Asan’ny Apostoly 3:12-16. Moa ve tsy ny herin'ny Fanahy Masina no nolazainy fa nahavita izany?
 
5. Moa ve ny Apostoly hafa koa tena mahery taorian'ny nahazoany ny Fanahy Masina? Asan’ny Apostoly 4:31, 33.
 
6. Moa ve nanao fahagagana lehibe i Filipo? Asa.8:6-7. Ary i Stefana? Asan’ny Apostoly 6: 8.
 
7. Moa ve nanao izany koa i Paoly? Asan’ny Apostoly 14:8-10, 14:3. Vakio koa ny Asan’ny Apostoly 28:3, 5.
FANAMARIHANA: Fotoana fohy taorian'ny niantsoan'i Jesosy azy (Asa.9:1-22), ny Apostoly Paoly, taorian'ny niovany, dia lasa fitaovana tena ilaina teo an-tanan'Andriamanitra.
 
8. Inona ireo fahagagana sasany nataon’izy sy ny Apostoly noho ny herin'Andriamanitra? Vakio ny Asan’ny Apostoly 9:36-41, 13: 6-11 ary 5:12, 16.
FANAMARIHANA: Tsy afaka nitsidika ireo marary rehetra naniry hohosorana i Paoly. Vokatr'izany dia nanosotra ny lamba na mosara i Paoly ka nalefany ho an'ireo nangataka fanosorana izany. Ary sitrana izy ireo (Asa.19:11-12). Izany fomba izany ihany koa dia mbola ampiasain'ny ministeran'Andriamanitra ankehitriny.
 
9. Mandritry ny famaizan'Andriamanitra izay tsy ho ela dia hianjady amin'ity tontolo mpanota ity, moa ve ny "vavolombelona roa" hanao fahagagana lehibe noho ireo vao hitantsika teo? Jaona 14:12, Apok.11:3, 5-6.

Ny dingana faharoa amin’ny famoronana ny olona

               Tao amin'ny Saha Edena, ny olona, amin'ny maha-singa ara-batana azy, dia noforonina ho lavorary, saingy tsy amin’ny maha zava-boahary ara-panahy azy. Tsy ampy ny herin’Andriamanitra izy.

1. Moa ve Andriamanitra manefy antsika tahaka ny mpanefy vilany tany mamolavola ny tanimanga? Isaia 64:7.

FANAMARIHANA: Mariho manokana ny ampahany farany amin'ity andalan-tSoratra Masina ity : "… ary mba halahelo ny asan'ny tananao Hianao." Ny asan’ny tanana dia i Joba, izay nahafantatra fa tanimanga malemy eo an-tànan'ny Tompo mpanefy tanimanga.

FANAMARIHANA: Isika izany dia zanaka notorontoronin’Andriamanitra.

2. Fantatr'i Joba ve izany? Joba 14:14-15.
3. Moa ve ny Kristiana niova fo, ary notarihin'ny Fanahy Masina, dia tefena sy amboarina toy izany? Isaia 43:7, Efes.2:10.
FANAMARIHANA: Ny mpisolo anarana hoe "isika" amin'ny fitenin'ny Testamenta Vaovao dia matetika manondro ny Kristiana marina. Asan'Andriamanitra isika; “voaforona… mba hanao asa tsara” isika - mba hahatratra toetra ara-panahy lavorary.
               Izay noharian'Andriamanitra ankehitriny ao amintsika, amin'ny alàlan'ny Fanahy, no sangan’asa fara tampony amin'ny zavaboary rehetra noforoniny. Ny olombelona, zava-boary tanimanga (Gen. 1), dia dingana voalohany amin’ny famoronana ihany. Tsy maintsy ampiofanina sy volavolaina amin’ny traikefam-piainana izy - ary miaraka amin'ny fanampian'ny Fanahy Masina - mba ho lasa zava-boary ara-panahy efa vita.
               Ny kristiana vao niova fo dia azo ampitahaina amin'ny tsaika izay notorontoronina ao an-kibon-dreniny.
 
4. Inona no iantsoana antsika rehefa maha-torontoronina antsika amin'ny Fanahiny ny Ray? 1Jaona 3:1, Rom.8:14-17.
5. Moa ve isika mpiombona amin'ny toe-panahy araka an 'Andriamanitra? 2Pet.1:3-4.
 
6. Inona no toetra lehibe indrindra amin'ny toe-panahy araka an'Andriamanitra? 1Jaona 4:16. Io fitiavana io ihany ve no ahafahantsika manatanteraka ny lalàn'Andriamanitra, izany hoe mankatoa an'Andriamanitra? Rom.13:10 sy 5:5.
FANAMARIHANA: Ny Fanahy Masina dia mampita amintsika ny fahefan'ny fitiavan'Andriamanitra. Ny fitiavana dia manampy antsika hitarika ny sitrapontsika hanao izay sitrak'Andriamanitra. Raha manana ny fitiavan'Andriamanitra ao anatinao ianao, dia hitandrina ny didy rehetra.
               Ny toetran'Andriamanitra, ny fitiavany, dia tsy maintsy mamirapiratra ao anatintsika amin’ny fankatoavana sy amin'ny asa tsara. Izay rehetra mbola manitsakitsaka ny lalàn'ny fitiavana dia tsy afaka mandray, na manana ny Fanahy Masina ao aminy.
 
7. Raha notorontoronin’ny Fanahin'Andriamanitra isika, dia mety ho lasa toa Azy ve isika? Sal. 17:15, 1Jaona 3:2.
FANAMARIHANA: Ankehitriny isika dia zanak’ Andriamanitra (notorontoroniny); ho toa Azy isika rehefa hateraka indray, ara-panahy.
 
8. Tokony hiova tanteraka ve ny fiainan'ny kristiana, izay notorontoronin’ny Fanahy? Hiala amin'ny lalan'ny ota ve izy? Rom.12:2, Efes.4:23-24.
Moa ve io dingana fanovana io miteraka ny"famoronana" vaovao ao anatintsika? 2 Kor.5:17.
FANAMARIHANA: Ny toe-tsainao dia tsy maintsy ovaina tanteraka; tsy maintsy miova fo ianao. Mitaky fahagagana io fiovana io. Tsy mety ho vita izany raha tsy torontoronin’ny Fanahy Masina ianao.
               Saingy, tsy hanatanteraka izany fanovana tanteraka anao izany Andriamanitra raha tsy vonona ny hanaiky Azy sy ny lalany ianao.
 
9. Mila mitombo ara-panahy ve ny kristiana notorontoronina? 2Pet.3:18. Ampitahaina amin'ny ankizy kely izay mila mitombo ve isika? 1Pet.2:2, Mat.18:2-3.
 
10. Amin’ny modely inona no tokony hampiorenana ny fitomboantsika ara-panahy? Efes.4:15. Inona no tanjon’izany? Andininy 13. Tokony hiaina ao anatintsika ve i Kristy? Kol 1:27.
FANAMARIHANA: Ny maha-feno Fanahy Masina anao dia hitondra ao aminao ny voa famafy avy amin'ny fomban'Andriamanitra. Izany no hampivelatra ny toetrany ao anatinao. Rehefa avy nandray ny Fanahiny ianao, dia manomboka mieritreritra toa Azy, hitovy fijery Aminy, hanao zavatra toa Azy. Hanana ny Fanahy mitovy amin'ny an’i Jesosy rehefa notorontoronina ianao, amin'ny maha-olombelona anao, amin'ny alalan'ny Fanahy Masina. Raha mitombo toy izany amin'ity fiainana ity ianao, mandritry ny fitsanganana amin’ny maty, Andriamanitra dia hanova anao ho zavaboary ara-panahy. Haterak'Andriamanitra amin'izay ianao.

Tratrantsika ny fahefana

1. Vonona hanome antsika ny Fanahy Masina ve Andriamanitra? Lioka 11:10-13. Misy fepetra ve amin’izany? Asan’ny Apostoly 2:38 sy 5:32. Tena ilaina ny mahatadidy izany.
 
2. Moa ve ny zanaka notorontoronin’Andriamanitra manana fifandraisana mivantana Aminy? Efes.2:13, 18, Heb.10:19-20.
 
3. Jesosy ve nilaza tamintsika ny fomba hanaovana an'io fifandraisana io? Mat.6:6.
FANAMARIHANA: Hatramin'ny nidinan'ny Fanahy Masina, ny olona, amin'ny fivavahany ary amin'ny alalan'i Jesosy Kristy, dia afaka miresaka mivantana amin'Andriamanitra Ray. Jesosy Kristy Zanany dia tonga nampahafantatra antsika ny Ray (Jaona 1:18). Nambarany fa isika rehetra dia afaka ny ho tonga zanaka notorontoronin'Andriamanitra Ray ary afaka mifandray Aminy amin'ny alàlan'ny Fanahy Masina.
 
4. Inona avy no tombontsoa ho azo avy amin'io fiarahana akaiky amin'ny Ray any an-danitra io? Mat. 21:22, Heb.4:16. Nahoana isika no afaka hahazo izay angatahintsika? 1Jaona 3:22.
 
5. Nahoana no nohainoana foana ny vavak'i Jesosy ? Heb.5:7.
FANAMARIHANA: Nifandray tsy tapaka tamin’ny Ray i Jesosy. Novaliana ny vavaka nataony noho ny herin'ny Fanahin’Andriamanitra izay nameno Azy. Isika koa, dia tsy maintsy manorina izany fifandraisana amin'ny Ray izany; ary hovaliana ny vavaka hataontsika, toy ny an'i Jesosy.
 
6. Inona avy ireo "voa" izay hiseho ato amintsika, raha manana ny Fanahy Masina isika? Gal.5:22-23, Rom.15:13.
 
7. Inona ireo "fanomezana" manokana homena antsika noho ny herin'ny Fanahy Masina? 1Kor.12:1, 4-11.
FANAMARIHANA: Ireo dia fitahiana sasany omen'Andriamanitra ho an'izay manaiky Azy, mba hahazoana ny herin’ny Fanahy Masina. Manolotra ny fanomezany araky ny sitrapony Izy.
 
8. Ny fitiavana ve no toetra lehibe indrindra ampitain'Andriamanitra amin'ny alàlan’ny Fanahiny Masina ? 1Kor.13:13 . Vakio tanteraka io toko io mba hahazoanao hevitra ankapobe momba an'io lohahevitra io.
FANAMARIHANA: Ny Baiboly teny frantsay sasany dia mandika ny teny hoe "fitiavana" amin'ny hoe "fiantrana". Koa satria saika very ny tena hevitr’io teny farany io, ankehitriny dia tsara kokoa ny manolo azy amin'ny hoe "fitiavana", toy ny ataon’ny ankamaroan'ny mpandika Baiboly ho amin'ny fiteny hafa.
 
9. Firy ny ampahany amin’ny Fanahy mety no azontsika mandritr'ity fiainana ity? Efes.1:13-14, 2Kor.5:5.
FANAMARIHANA: ny "tsatòka" na "antoka" dia maneho zavatra omena mialoha mba hahazoana antoka ny fanatanterahan’ny fifanarahana iray. Ny "tsatòkan'ny Fanahin’"Andriamanitra dia maneho ny ampahany kely amin'ny Fanahiny sy ny Fahefany, izay mameno antsika. Saingy, amin'ity fahafenoana ity, dia mitombo ara-panahy isika.
 
10. Moa ve isika mandray indray mandeha ihany ny `tsatòkan'ny Fanahy Masina rehetra izay ilaintsika amin'ny androm-piainantsika? 2Kor.4:16 sy Fil.1:19. Ny Fanahy Masina dia ampitahaina amin'ny rano izay mikoriana.
FANAMARIHANA: Andriamanitra dia tsy nametraka karazana dynamo mazika ho entiny mamelona indray ny heriny. Tsarovy ny tenin'i Jesosy momba io herin’Andriamanitra izay miboiboika ao anatintsika io (Jaona 7:38). Io hery io dia miasa sy mavitrika. Miboiboika ao anatintsika io; manatanteraka ny sitrapon'Andriamanitra io.
               Ny Fanahy Masina dia mikoriana avy amin'Andriamanitra mankao amintsika, avy eo dia mivoaka avy ao amintsika amin'ny endrika fitiavana, fankatoavana, finoana, fifaliana ary faharetana; Izy dia manao fahagagana. Tsy maintsy havaozina isan'andro izany amin'ny alàlan'ny fifandraisantsika amin'Andriamanitra amin'ny alalan'ny vavaka ataontsika.
               Manomboka mahatakatra ve ianao fa ho tsara kokoa ny fiainanao raha mifandray amin'ny Mpamorona anao ianao ?

Ny lakilen'ny tsi-fahafatesana be voninahitra

1. Nahoana ary ny Fanahy Masina ao anatintsika, no fanalahidin'ny fiainana mandrakizay sy ny voninahitr’isika ? Maty ve i Jesosy Kristy? 1Kor.15:3. Natsangana tamin'ny maty ve Izy? Andininy 14.
 
2. Iza no nanangana Azy tamin'ny maty ? Efes.1:20, 17.
3. Nahoana no nanangana Azy ho amin'ny tsi-fahafatesana Izy!
FANAMARIHANA: Jesosy dia notorontoronin’ny Fanahy Masina ara-nofo. Ny herin'io Fanahy io ao Aminy no hitahiry Azy ho madio ara-panahy. Izany no antony nananganan'ny Ray Azy ho amin'ny tsi-fahafatesana. (Rom.8:9 ary 1Pet.3:18). Ho setrin’izany kosa, isika dia tokony ho madio ara-panahy, amin'ny herin'ny Fanahy, mba hatsangana ho amin'ny tsi-fahafatesana.
 
4. Moa ve misy porofo marobe momba ny fananganana an'i Jesosy tamin'ny maty? 1Kor.15:5-8.
 
5. Izy ve no voalohany amin’ireo maro izay hatsangana ho amin'ny fiainana mandrakizay? Asan’ny Apostoly 26:23, 1 Kor. 15:23.
FANAMARIHANA: Araka ny efa hitantsika, Izy dia "lahimatoa amin'ny rahalahy maro" (Romana 8:29).
 
6. Moa mampanantena ve ny Ray izay nanangana an'i Jesosy fa hanangana amin'ny tsy fahafatesana koa ny kristiana rehetra izay tarihin'ny Fanahy Masina, raha mitoetra ao aminy io Fanahy io ? Rom.8:11 sy 1Kor.6:14. Eto dia manondro an'i Kristy ny anaram-boninahitra hoe "Tompo".
 
7. Rahoviana no hitranga ny "fiovantsika"? 1 Kor.15:44-45.
FANAMARIHANA: Ny fahasamihafana lehibe eo amin'ny vatana izay ananantsika ankehitriny sy ny ho azontsika amin'ny fitsanganana amin'ny maty, dia ny vatantsika ankehitriny dia nofo, mety maty, fa ny vatana izay ho raisintsika dia ho ara-panahy sy tsy mety maty.
               Raha mbola miaina mandritry ny fitsanganana amin'ny maty isika, dia hiova tampoka ny vatantsika mety maty. Raha maty alohan'io fanovana io isika, dia hanangana antsika Andriamanitra ary hanome antsika vatana ara-panahy (2Kor.5:2).
 
8. Moa ve Jesosy, nanana ny vatany ara-panahy, dia afaka niseho sy nanjavona araky ny sitrapony? Lioka 24:36-37, 31. Nandalo ny rindrina sy ny varavarana mihidy ve Izy? Jaona 20:19.
FANAMARIHANA: Rehefa ho lasa fanahy isika, dia tsy fehezin'ny lalàna araky ny fizika intsony, satria tsy ho matiera (akora) intsony isika, fa fanahy.
 
9. Moa ve ny vatana ara-panahy afaka mivezivezy eny amin'ny habakabaka amin'ny hafainganam-pandeha tsy takatry ny saina? Jaona 20:17 sy Mat. 28:9.
FANAMARIHANA: I Kristy dia niakatra tany amin'ny Ray any an-danitra ary niverina teto an-tany tamin'io andro iray io. Hitanao amin’izany indray ny herin'ny Fanahy Masina izay miasa.
 
10. Raha ilaina izany, moa ve ho afaka hiova vatana isika ary miverina maka ny tenantsika fizika mba ho hitan'ny olona mety maty? Lioka 24:37-39.
 
11. Mety maty ve ny fanahy? Lioka 20:36.
 
12. Niverina amin’ny voninahiny indray ve i Jesosy taorian'ny nitsanganany tamin'ny maty '! Jaona 17:4-5. Inona no fisehon'ny vatany niverina amin’ny voninahiny? Apok.1:13-16. Ahoana no nanomezany voninahitra ny Ray nandritry ny fiainany ara-nofo teto an-tany ?
FANAMARIHANA: Jesosy Kristy, talohan'ny nandraisany ny endriky ny olombelona, dia nanana tena ara-panahy, be voninahitra, toy ny an'Andriamanitra Ray. Ankehitreiny, dia manana ny tenany be voninahitra indray Izy.
               Tamin'ny fananganana ny maty, ny fanasitranana ny marary, ny nankatoavany ny Rainy, ny nanaovany fahagagana teto an-tany, dia nanome voninahitra ny Ray i Jesosy ary naneho tamin'ny olona ny ampahan’ny herin'Andriamanitra.
               Tsy mbola nanana ny tenany nomem-boninahitra Izy tamin'ny nisehoany tamin'ny mpianany nandritra ny efapolo andro taorian'ny nitsanganany tamin'ny maty (Asa 1:2-4, 9). Fa manana izany Izy ankehitriny.
 
13. Amin'ny fitsanganana amin'ny maty, moa ve Andriamanitra hanome voninahitra ny zanany notorontoronin’ny Fanahy Masina, amin'ny fanomezana azy ireo ny hery sy ny voninahitra toy izany? Rom.8:17 sy Kol.3:4.
 
14. Moa ve Jesosy, tamin'ny Fiovan-tarehiny, nanome antsika ny hevitr'izany voninahitra izany izay hatokana ho antsika ? Mat.17:2. Mariho tsara fa fahitàna ihany no nojeren'ireo mpianatra ireo. Andininy 8.
FANAMARIHANA: Amin'ny fitsanganana amin'ny maty, ny tenantsika ara-panahy dia hamirapiratra tahaka ny masoandro.
 
15. Inona avy ny andinin-tSoratra Masina hafa milazaà koa ny tena nomem-boninahitra ? Dan.12:2-3.

FANAMARIHANA: Ny andininy 17 dia miresaka momba ny Ray sy Kristy. Ary ny andininy faharoapolo dia manindry fa naneho ny tanjany Andriamanitra Ray  " tamin'ny nananganany Azy [Kristy] tamin'ny maty sy ny nampitoerany Azy [Kristy] eo amin'ny tànany ankavanana any an-danitra". Andriamanitra Ray no nanangana an'i Kristy ho amin'ny tsi-fahafatesana.

Famintinana

               Tian'Andriamanitra hapetraka ao amin'ny olombelona, ho fanomezana maimaimpoana, ny herin'ny Fanahiny Masina. Noho ny fanampian'io hery io, dia ho afaka hitandrina tanteraka ny lalàn’Andriamanitra masina sy ara-panahy ny olombelona. Izany dia ampahany amin'ny fomba izay hanatanterahan'Andriamanitra ny anjarany amin'ny Fanekena Vaovao miaraka amin'ny zanany notorontoroniny.
               Tamin'ny alàlan'ny Fanahy Masina no nanoratany ny Lalànan'ny mpanjaka be fitiavana tao am-po sy ny sain'ny tena kristiana. Mamita ny famoronany lavorary sy ara-panahy Izy eo amin'ireo te hanaiky Azy tanteraka, ary mamela ny Fanahiny Masina mba hiditra ao amin’ireo ary haha-torontoronina azy ireo ho zanany ara-panahy.
               Ity fiainana ity dia sehatra fiomanana na fiofanana. Eto an-tany isika mba hianatra hitantanana am-pahombiazana ny hery homen'Andriamanitra antsika, rehefa ovaina ho fanahy isika.
               Amin'ny fitsanganana amin'ny maty, dia ho vita ny famoronana antsika ara-panahy. Hatao ho Fanahy tanteraka isika ary hiaina ao amin'ny Fanjakan'Andriamanitra.